मुंगी

 

#मुंगी

  एक मुंगी होती. मुंग्या सगळ्या लहानच असतात,पण ही त्यातही लहान होती. तिला जमिनीमधून आतून आवाज ऐकू यायचे. हादरे जाणवायचे. इतर मुंग्यांना ही ऐकू यायचं, जाणवायचं; पण 'नेहमींचच' आहे , त्यात काय? .. असं वाटायचं.

  पण लहान मुंगीला वाटायचं की "असं कसं? असं का? असं कुठून?" लहान मुंगी चे पाय तर तिच्या पेक्षाही लहान होते. त्या पायांनी अतिशय जास्त अंतर चालत लहान मुंगी आवाज , हादरे इत्यादीच्या मूळ उगमाकडे जायला.. जवळजवळ पोहोचायला लागली.

   तिला ठाऊक नव्हतं की या जागी जिथे पोहोचलोत आपण तो एक समुद्र किनारा आहे. पण आपल्याला अर्थातच दिसू शकतं की लहान मुंगी समुद्रा जवळ वाळूत आहे! 

   वाळूत आल्यावर मात्र हादरे कमी झाले जमिनीतून येणारे... लहान मुंगी च्या लक्षात आलं. पण आवाज .. समुद्राची गाज मात्र जास्त गंभीर आणि दमदार झाली. अर्थात तिला हा हा समुद्र आणि हा इतका इतका मोठा .. हे काही कळलं किंवा दिसलं नाही. पण आपल्याला समुद्रा पुढे मुंगी कितीशी? हे जाणवतं.

   समुद्राच्या आवाक्याची चुणूक दाखवायला पांढरी फेसाळ आणि अनेक पदरांची लाट सळसळ सळसळ वेगाने मुंगीच्या अंगावरून घमघमघमघम करत गेली! एका बिंदूशी निमिषभर स्तब्ध होऊन आली त्याही पेक्षा खूप जास्त वेगवान 'खेच' बसली लाटेला...ती सरसरसरसरसर करत समुद्रात ओढली गेली.

    आपल्याला अर्थातच वाटतं की लहान मुंगी लाटेत गिळली गेली असणार आणि लहान असल्याने ती आपल्याला दिसणार नाही! त्यामुळे आपल्याला धक्का बसेल हे बघून की लहान मुंगी अजूनही किनाऱ्यावर आहे!! 

    लहान मुंगी ने तिच्या पेक्षाही लहान वाळूचा कण पकडून ठेवला , लहान वाळूचा कण दुसऱ्या कणाला, दुसरा कण तिसऱ्या कणाला पकडत पकडत किनाऱ्यावर टिकून राहिले. 

    आपल्याला भुसभुशीत, निराधार वाटणारी वाळू ... पाय वर घ्यायचा प्रयत्न केला तर पाय आणखी आत खेचणारी वाळू!! अर्थातच आपण मोठे आणि वजनदार असल्याने , जडत्व सोडू न शकणारे असल्याने लहान मुंगीच्या हलकेपणा मधलं मर्म समजू शकत नाही.  

     लहान मुंगी एवढी लहान, की तिला वाळूचा मोठेपणा दिसतच नाही. हादरे शोषणाऱ्या वाळूचे दडपण अर्थात तिला येतच नाही. पाण्यात भिजूनही वाळू ना ओली होत ना खारट! इतरांचा पाय गोठवून टाकणारं वाळूचा संकट लहान मुंगीला साधन ठरतं. पण आपल्याला जी ही गोष्ट खूप अचंब्याची वाटते , ती लहान मुंगीसाठी अस्तित्वात सुद्धा नाही. 

   जर लहान मुंगी वाळूला घाबरली असती तर वाळूच्या कणाची तरी मदत तिने का घेतली असती? 

२२ मार्च २०२२