#उशी

 #उशी 

  लहान मुलं बरेचदा रात्री झोपताना कुशीत काही तरी खेळणं घेऊन झोपतात. बाहुली , टेडी बिअर वगैरे! माझा मुलगा एक साॅफ्ट टाॅय ... प्रीतीने भेट दिलेलं मनी माऊ कुशीत घेऊन झोपी जायचा. खरं म्हणजे त्या माऊवर लिहिलं होतं ... washable! पण प्रत्यक्षात मात्र ती धूतली आणि खराब झाली 😢 पुढले काही दिवस अस्वस्थ चुळबुळ झोप झाली होती लेकाची! 

  काही वर्षांपूर्वी फोमची गादी घेतली तेव्हा दोन उश्या सोबत मिळाल्या होत्या. मी डोक्याखाली कापसाचीच उशी घेते. फोमची एक उशी लेक वापरतो , दुसरी तशीच बेडवर इकडे तिकडे असायची! मध्यंतरी मला ती उशी कुशीत घ्यायची सवय लागली होती. 😅 

   रोज रात्री नव्हे ... रोज रात्री दिवसभराच्या दगदगीने अंग टाकल्या बरोबर झोपेत गुडूप!! पण क्वचित सुट्टी चा दिवस , एखादा आळसातला दिवस सरला ..की मात्र रात्री चटदिशी झोप येत नाही!! Ott पहाता पहाता किंवा काही वाचताना किंवा सहज लोळताना या उशीला मिठी मारून विसावायचं! 

   कशी कोण जाणे! पण ती उशी पलंगाच्या पलिकडे पडून पार खाली गेली आहे.बेड खूप अवजड! बाहेर काढता यायची शक्यता नाही. काढायचा प्रयत्न केला तरी ती इतकी धूळ भरली होईल की परत कुशीत घेववणार नाही. आत्ता जर्रास वाईट वाटलं ..पण चालसे!! कामात व्यग्र , व्यस्त दिवस आहेत तोवर काही चिंता नाही. पण एखाद्या निवांत , निवलेल्या संध्याकाळी कदाचित या उशीच सय येईलच! 

    कोणी म्हणाल ...त्यात काय? नवीन घ्या दुसरी उशी! पण ती तश्शीच  तेवढ्याच आकाराची , ठराविक ठिकाणीच पिचकलेली , तेलाचा वास येणारी वगैरे आणि मुख्य म्हणजे 'सवयीची' उशी परत मिळणार नाही. त्या पेक्षा उशी शिवायच झोपायची सवय लागलेली बरी .. नाही का? 

#प्रज्ञा 

(१४ डिसेंबर २०२१)